Wala nakakuha ang Bacolod Police Station 4 sang witness sa pagpatay sa ginaalegar miyembro sang Aki Cuadra Robbery Group nga si Arian Mark Salaver sa Purok Cabacawan, Brgy. Villamonte sang Miyerkules sang gab-i.
Suno kay Police Major Ritchie Gohee, station commander sang Bacolod Police Station 4, gin-waive na sang pamilya ni Salaver ang request nga ipaidalom sa autopsy examination ang bangkay.
Tubtub subong suno kay Gohee, wala pa sila sang ginasundan nga lead sa krimen kag nagatinguha pa man nga makakuha sang nakasaksi.
Suno sa station commander, nahadlok ang mga miyembro sang pamilya ni Salaver kag mga tupad-balay nga magtindog nga witness apang sila ang nagalaom nga makakuha gihapon sang saksi.
Nagpanawagan man si Gohee sa sin-o man nga may nahibaluan sa krimen nga indi magkahadlok nga magpalapit sa iya nga opisina agud nga mahatagan sang hustisya ang kamatayon ni Salaver nga mas kilala bilang Jokjok.
Si Salaver ang ginpasakaan sang Bacolod Police Station 7 sang pila ka kaso bangud sa kahilabtanan sini sa mga krimen sa ila nga areas of jurisdiction.
Suno kay Police Capt. Elmer Bonilla, station commander sang Police Station 7, ginkasuhan si Jokjok sang frustrated murder kag robbery matapos nga gintiro ang persona nga iya ginhold-up sa Barangay Vista Alegre.
Ginkasuhan man ini sang carnapping kag robbery sa separado pa gid nga insidente kag ginahulat nalang kuntani nga mapagwa sang korte ang warrant of arrest.
Bangud ang nauna nga mga kaso ang ginauyatan sang Police Station 7, wala na sila sang imbestigasyon nga patigayunon bangud nafile na ang kaso kag indi man sa ila sakop natabo ang pagpatay sa iya.
