Duha ka mga pulis kag isa ka sibilyan ang nasamaran sa nagluntad nga pagpang-ambush sa Barangay Bi-ao, banwa sang Binalbagan, Domingo sang aga.
Sa interview sang Bombo Radyo kay Punong Barangay Juner John Salazar sang Barangay Bi-ao, pasado alas 6:00 sang aga sang may nabaton sila nga report nga may nasapwan nga bangkay sa Nursery sa nasambit nga barangay kag sang malapit na sila sa lugar, may nabatian ang mga ini ini nga makusog nga paglupok kag ginsundan sang asod-asod na nga linupok.
Suno kay Salazar, ulihi na nila nahibaluan nga nagresponde didto ang mga personnel sang Binalbagan Municipal Police Station nga amu ang natiruhan kag nasamaran sa paglinupok.
Duha kag mga police personnel kag isa ka sibilyan ang nasalabat.
Ginkilala naman sini ang ginreport bangkay nga napatay kay Jay-R nga suno sa iya, mabuot kag simple nga residente sang ila barangay.
Suno diri, wala pa nahibaluan kun sin-o ang nagpatay sa iya.
Suno sa punong barangay, humalin sang ini ang nagpungko sa pwesto sang 2018, wala pa sang may natabo nga ambush sa ila barangay.
Suno sa iya, indi man madamo ang mga miyembro sang New People’s Army sa ila barangay kag padayon man sang mga ini nga ginamonitor kun sin-o ang nagagwa sulod sa ila lugar.
Aminado ini nga malapad ang sakop sang Barangay Bi-ao kag humalin sadto, wala man sang may nagsungka nga residente nga nagapahayag nga ini ang katapo sang NPA.
Nagahingyo ini sa mga pumuluyo nga magbuligay agud mapabalin ang kalinong kag katawhay sa ila barangay.
