Dako ang posibilidad nga New People’s Army ang nagluthang patay sa 29-anyos nga tapasero Brgy. Bi-ao banwa sang Binalbagan, Negros Occidental, Domingo sa aga.
Sa interview sang Bombo Radyo kay Police Major Ellendie Rebusquillo, hepe sang Binalbagan Municipal Police Station, ginpahayag sang asawa ni Berdito Roso, 29 anyos, residente sang nasambit nga lugar, nga may apat ka armado nga mga lalaki nga nagahambal sang Cebuano nga linggwahe kag nagapangita sa iya bana, samtang may duha naman ka lookout nga kaupod ang mga ini.
Ginaalegar sang mga armado nga may utang si Roso.
Naalarma ang biktima kag nagdalagan apang ila ini ginluthang kag natumba.
Sang natumba si Roso, ginluthang nila sang makaduka ka beses sa ulo kag sa dughan.
Wala naman sang rekord sa kapulisan ang biktima.
Sa karun ginahibalo pa sang mga ini ang motibo sang krimen apang suno sa hepe, posible nga mga miyembro sang NPA ang mga suspetsado.
Nagapati man si Rebusquillo nga isa lamang ka grupo ang nagluthang kay Roso kag ang nag-ambush sa mga kapulisan sang sila ang nagresponde diri.
