Nakabaton sang intelligence report ang 303rd Infantry Brigade sang Philippine Army nga ginhungod sang New People’s Army ang pagpatay kay Jay-R Roso sa Sitio Nursery, Barangay Bi-ao, Binalbagan kahapon sang kaagahon agud nga magresponde ang mga pulis.
Sa interview sang Bombo Radyo kay 303rd IB commander Brigadier General Inocencio Pasaporte, si Roso ang ginapahayag nga malapit nga abyan sang isa ka CAFGU member sa Cansolongon detachment gani ini ang gingamit nila nga rason agud nga magreact ang mga pulis.
Suno kay Pasaporte, legitimate ang pagreport sang barangay officials sang krimen sang kaagahon apang ginatukib pa ang mga link nga nakaset up ang NPA sang roadside bomb sa Sitio Candida Dos.
Santo sa intel report sang Philippine Army, 12 tubtub 15 ka mga rebelde ang perpetrators samtang wala naman sang ginbutang nga blocking force sa palibot.
Ginapatihan suno sa heneral nga kulang ang planning ukon kulang ang pwersa sang NPA ukon gamay lang nga grupo ang nagtipon agud indi mareport sang mga pumuluyo gani indi tuman ang halit nga natuga sa mga pulis samtang wala naman naglupok ang duha ka improvised explosive device.
