Ginkompirmar sang tagpamaba sang Police Regional Office (PRO) 6 nga ginbisita sang ila director ang isa sa duha ka mga pulis nga na-hospital matapos nalukpan sang Improvised Explosive Device (IED) sa Sitio Candida 2, Barangay Bi-ao, Binalbagan, Negros Occidental sang tinalikdan nga Domingo sang aga.
Sa interview sang Bombo Radyo Bacolod kay Police Lt. Col. Arnel Solis, ginpahayag sini nga sa pagbisita ni PRO-6 Regional Director Police Brigadier General Flynn Dongbo kay Binalbagan Municipal Police Station, Deputy Chief of Police Lt. Charles Richard Casalan nakabatun ini sang “Medalya ng Sugatang Magiting” kag cash assistance.
Suno kay Solis ang “Medalya ng Sugatang Magiting” ang ginahatag sa mga police nga nagpanguna sa legitimate operation nga nasamaran.
Suno kay Solis sa pihak sang pagpang-ambush, kun sa diin wala sang narekord nga casualty, ini ang nagapakita lamang nga ginahimo sang maayo sang kapulisan ang ila nga trabaho.
Ginpahayag man sini nga ang tikang nga ginhimo sang CPP-NPA sa banwa ang isa ka traidor nga pamaagi bangud gintublag sang mga ini ang peace and order sa Barangay Bi-ao, Binalbagan.
Sa karun nagapadayon pa ang pagpatigayon sang hotpursuit operation sang katapo sang Philippine Army kag mga kapulisan agud nga maaresto ang may kahimuan sa pag-ambush sa mga kapulisan sang Binalbagan kasubong man sa nagpatay sa isa ka sibilyan nga respondehan kuntani sang mga kapulisan.
