Nagpangayo sang pasaylo ang hepe sa Bacolod Police Station 8 sa Bureau of Jail Management and Penology (BJMP) 6 bangod sa damlag lang nga pagminsyunar sini sa institusyon nga may kapaslawan sa pagbantay gani may nagaluntad nga transaksyon sang iligal nga droga sa sulod sang pasilidad.
Madumduman nga sa mga nadakpan sa drug buybust operation sang Bacolod Police Station 8 sang Pebrero 1 kag 10, gintuad sang mga suspetsado nga druglord sa sulod sang BJMP facility sa Baranay Taculing ang ila ka transaksyon, nga nagamando sa pagpatiyog sang iligal nga droga sa syudad sang Bacolod kag probinsya sang Negros Occidental.
Suno kay P/Maj. Joery Puerto, indi bilog nga institusyon ang ginapahayag sini nga may kakulangan kundi ang personnel sang BJMP Taculing.
Madumduman nga nagrequest sang public apology ang BJMP 6 bangod sa nangin pahayag ni Puerto nga naga-igo sa bilog nga institusyon.
Suno kay Puerto, kun nakapahayag man ini nga nag-generalize sa BJMP, nagapangayo ini sang pasaylo bangod mahimo tuga ini sang iya nga kakapoy.
Apang nagapanindugan ini nga matuod nga may nagamando nga drug lord sa paglibot sang transaksyon sa syudad kag probinsya bangod ini mismo ang gintuad sang mga nagkaladakpan kay may ginahuptan ini nga video nga nagapamatuod sa alegasyon.
Makita sa video nga ang priso sa BJMP Taculing ang nagavideo call sa sagwa sang prisuhan kun sa diin makita man diri ang dalagko nga balor sang iligal nga droga nga ginapamutos sang iya kasugilanon.
Panugyan man sini ang pagbuligay kag koordinasyon sa tunga sang mga ahensya sa kaangay nga sitwasyon kag suno pa sa hepe, indi man sini luyag nga may pangalan pa sang institusyon nga maulamid gani dapat nga mahimuan ini gilayon sang tikang.
