Nagpanindugan ang director sang Social Action Center sa Diocese of Bacolod nga dapat nagatambong sa debate ang mga kandidato nga nagapapili bilang presidente.
Sa interview sang Bombo Radyo Bacolod kay Fr. Chris Gonzales, ginpahayag sini nga ang debate ang kaangay sang job interview nga kun indi makapakita ang aplikante mahimo nga indi makapasar.
Sa tion sang job interview ginaplastar sang aplikante ang plano kag handom sini para sa kompanya nga gin-applyan.
Suno kay Gonzales, pareho man ini sa mga kandidato, dapat atun nga pamatian ang ila plataporma agud aton mahibaluan kun sa diin kita pagadal-on kag kun ang ila handom para sa pungsod kasubong man sa atun nga mga pumuluyo.
Importante nga mahibaluan sang publiko ang pamatasan kag plano sang mga pulitiko bangud anum ini ka tuig nga magapungko sa serbisyo sa tion nga ini ang mapilian.
Nagpanugyan man ang pari nga dapat pamatian sang mga pumuluyo ang mga plataporma sang mga pulitiko agud nga sila ang masukot kun indi sang mga ini matuman sa tion nga magpungko ang mga ini kag ang puturo naton kag sang masunod nga henerasyon ang nakasandig sa atun mga ginpili nga magapungko sa pwesto agud maghatag sang serbisyo sa mga pumuluyo.
