Madamo sang mga kontrabando nga narecover sa ginpatigayon nga greyhound operation sa Metro Bacolod District Jail sa Barangay Singcang-Airport, Bacolod City.
Kalakip sa mga recoveries ang nga kutsilyo, improvised nga mga patalom, electronic devices, charger sang cellphone, sigarilyo, lagari, kudkuran sang lubi kag ice kag iban pa nga mga kontrabando.
Suno kay Jail Superintendent Marie Rose Laguyo, nga amo man ang provincial administrator sang Bureau of Jail Management and Penology (BJMP)-Negros Occidental.
Paathag sini nga may plano na nga magpatigayon sang grey hound operation series ang BJMP Regional Office 6 kag naumpisahan na nila ini sa Aklan.
Natabuan naman suno diri nga nagpagwa sang statement ang hepe sa Bacolod Police Station 8 nga si P/Maj Joery Puerto angot sa gina-alegar drug lord nga amo gihapon ang nagapalakat sang droga sa gwa pinaagi sa pagvideo call sa iya nga mga tawo.
Apang paathag ni Laguyo nga wala nila ginpatigayon ang grey hound operation bangod lang sa statement ni Puerto kundi nakaplano na ini.
Samtang pasalig naman sini nga ginakonsiderar nila ang kaangay nga mga impormasyon kag dapat ini nga mahatagan sang atensyon.
Aminado naman ini nga normal lang ang paglain sang buot sang mga opisyal sang BJMP nga wala sang ginabuhat nga malain sang ginminsyunar ang nagakatabo sa sulod sang pasilidad kag kaangay nga nageneralize sa bilog nga institusyon.
Apang pahanumdom sang Jail Superintendent nga wala man sang dapat nga mangutos bangod natural na ini sa serbisyo kag dapat nga magmove forward ang mga ini pinaagi sa pagtadlong sa mga dapat matadlong.
Suhestyon man sini nga mas maayo kun magbuligay ang nanarisari nga organisasyon sang gobyerno, partikular na ang mga uniformed personnels sa pag-address sa kaangay nga mga problema.
Pasalig naman ni Laguyo nga nagakoordinar ang mga ini sa Philippine National Police (PNP) kag Philippine Drug Enforcement Agency (PDEA) para sa Intel-driven Grey Hound Operation magluwas pa sa ginapatigayon nga regular nga grey hound operation.
Pasalig naman sini sa publiko nga bilang Provincial Administrator sa BJMP Negros Occidental, ginahimo sang mga ini ang sarang nga mahimo.
Panawagan naman sini sa iban nga ahensya nga maghugpong ang mga ini bilang magka-alyado agud nga mas mangin epektibo ang pagpakigbato sa droga.
Ginpahayag man sini nga kahapon nagpatigayon sila sang drugtest sa mga BJMP personnel kasubong man sa mga person deprived of liberty (PDL).
Ini ang regular nga ginapatigayon kada bulan kag quarterly.
