Nag-issue ang Regional Trial Court (RTC) Branch 73 sa Sagay City, Negros Occidental sang 20-day temporary restraining order (TRO) batok sa importasyon sang 200,000 metric tons sang refined sugar sa idalom sang Sugar Order No. 3 sang Sugar Regulatory Administration (SRA).
Nag-ugat ang TRO sa civil case for injunction with prayer for the issuance of TRO nga ginpasaka sang United Sugar Producers Federation (UNIFED) member-association, ang Rural Sugar Planters Association Inc., nga ginapamunuan sang presidente sini nga si Joseph Edgar Sarrosa batok sa SRA nga ginarepresentar ni Administrator Hermenigildo Serafica.
Sa duha ka pahina nga mando nga napetsahan February 11, ginpahayag ni RTC Branch 73 Executive Judge Reginald Fuentebella nga ang grupo ni Sarrosa ang nagpakita sang satisfaction sa korte nga ang importasyon sang kalamay ang magatuga sang malain nga epekto sa sugar industry.
Suno kay Fuentebella, ang gravity sang possible injury nga indi maunderestimate bangud tatlo ka milyon ka mga Pilipino ang nagasalig sa industriya sang kalamay.
Ang hearing sa motion para sa writ of the preliminary injunction ang patigayunon sa February 24, alas 09:00 sang aga paagi sa video conference.
Nahibaluan nga ng Negros Occidental ang nagapanguna nga sugarcane-producing province sa Pilipinas nga nagagenerate sang kapin 60 percent sa sugar output sang pungsod.
Samtang, nagpasar man ang Sangguniang Panlalawigan sang Negros Occidental sang resolusyon nga nagahingyo nga indi pagdayunon sang SRA ang importasyon sang 200,000 metric tons sang refined sugar.
