Nagapanindugan ang mga benepisyaryo sang Comprehensive Agrarian Reform Program sa Brgy. Purisima, banwa sang Manapla nga sila ang matuod nga nagapanag-iya sang duta nga ginatindugan sang Victorias Milling Company kag indi ang VICMICO.
Sa interview sang Bombo Radyo sa vice president sang Task Force Kasanag nga si Atty. Brick Reyes, may yara na sang Certificate of Land Ownership Award kag may titulo na ang duta sa ngalan sang Republika sang Pilipinas para sa 105 tanan ka agrarian reform beneficiaries sa Barangay Purisima.
Ini ang natigayon sa idalom sang liderato ni former DAR Secretary Rafael Mariano apang naghingagaw ang VICMICO nga ipareclassify ang duta bilang industrial land nagikan sa agricultural.
Sang nagbulos si Secretary John Castriciones, nagtukod ini sang komitiba para sa implementasyon sang CARP kag diri na gin-entertain ang request sang VICMICO para sa reclassification.
Apang wala napirmahan ni Castriciones ang resolusyon sang komitiba.
Suno kay Reyes, sa idalom sang RA 6657 ukon ang CARP Law, ang secretary lamang sang DAR ang makaamend sang classification ukon makacancel sang titulo.
Nagfile naman sang petition ang mga ARBs nga ireclassify ang duta bilang agricultural apang nag-issue na ang Registry of Deeds Negros Occidental sang bag-o nga titulo para sa VICMICO.
Suno kay Reyes, indi pwede ang ginhimo sang registrar nga si Danny Co bangud may existing title sa idalom sang Republic of the Philippines kag may yara naman sang P30 million nga deposito ang national government sa Land Bank of the Philippines bilang bayad sa VICMICO.
Sa karon, nagbutang na ang VICMICO sang mga gwardya nga indi makasulod ang ARBs sa duta.
Suno kay Reyes, nagaplano ang ARBs nga magfile sang legal action batok sa ROD sang Negros Occidental bangud sa pag-issue sang titulo.
Ginpahayag man ni John Chiong, ang national commander sang Task Force Kasanag nga nagpasaka na sila sang kaso sa Office of the Ombudsman batok sa Local Government Unit (LGU) sang Manapla, pinuno sang Environmental Management Bureau (EMB) kag Department of Environment and Natural Resources (DENR) kag ginfollow-up na sa national office sang Ombudsman kag lunsay may mga resulta na ini.
Ginpahayag man ni Chiong nga nakapadala na sila sang sulat sa Victorias Milling Company nga maghatag sang pamatuod nga legitimate ang ila nga operasyon apang wala pa sang sabat ang VICMICO.
Nagpasaka man ang mga ini sang reklamo sa opisina ni Department of the Interior and Local Government(DILG) agud mafast track ang paghatag sang resolution sa ginpasaka nga reklamo batok sa LGU sang Manapla.
Gin-athag man sini nga tubtob lamang sa legal nga dokyumento ang mabulig sang TFK sa ila mga ginabuligan.
