Dako ang pagpamatok sang transport sector sa syudad sang Bacolod sa ginhuman nga panibag-o nga Local Public Transport Route Plan nga gin-endorso na sa Central Office sang Land Transportation Franchising and Regulatory Board (LTFRB).
Suno kay Diego Malacad, secretary-general sa United Negros Drivers and Operators Center (UNDOC), kapin 70 porsyento nalang sa 3,887 ka mga traditional jeepney ang madula ukon kapin 1,096 traditional jeepney ang sarang makabyahe sa 23 ka panibag-o nga ruta.
Dugang pa sini nga kooperatiba na kag korporasyon ang mangin sentro sini gani magadalagan nalang sa lima ka kooperatiba ang maka-avail sang ruta.
Aminado si Malacad nga may mga ruta sang jeep nga gindula, samtang may pila man nga gindugang.
Apang ginalantaw sang transport sector nga kaangay nga wala nakita sang Committee on Transportion sang syudad sang Bacolod nga kinahanglanon sang pigado nga pasahero ang traditional jeepneys.
Bangod sa dislocation sang mga ruta, ginalantaw ni Malacad nga madamo sang mga drivers kag operators ang maapektuhan ang palangabuhian kasubong man sa mga pasahero.
Panindugan sang UNDOC nga dapat mapaathag sa ila kun sa diin ginkuha ang data sa pagdihon sang Local Public Transport Route Plan.
Suno kay Malacad, antes mahuman ang plano dapat nga nagpatigayon anay sang consultation, public hearing kag ginpatawag ang mga stakeholders nga maapektuhan.
Aminado man ini nga may pila ka makabenipisyo pinaagi sa ruta apang indi naman ini magakomporme sa mga pasahero nga nagakarga sang mga pasayan, kasag, green shell kag isda kun airconized nga modern jeepney ang pagasakyan.
Dugang pa nga iban sa mga ini ang mapilitan nalang nga maglakat bangod madula na ang ruta sang jeep sa Granada-Alangilan kag UV express ang igabulos sa pagbyahe.
Indi naman magpati sa Malacad nga wala makahangop ang Committee on Transportation bangod ang chairman nga si Councilor Dindo Ramos ang pila man ka tuig nga nagserbi bilang Punong Barangay sa Granada gani mas nakahibalo ini sa sitwasyon.
Panawagan sang UNDOC nga irecall ang City Ordinance No. 966 series of 2021 kaupod sa endorsement nga ginapadala sa LTFRB Central Office.
Nahibaluan nga ang nagcompose sang Local Public Transport Route Plan amo si Mrs Gina Ramos nga asawa ni Councilor Dindo Ramos.
Hingyo sang transport group nga klaruhon sang mga ini ilabi na nga ang apektado amo ang transport industry kag mga stakeholders ilabi na karun nga naga-atubang pa ang mga ini sa epekto sang Bagyo Odette kag COVID-19 pandemic.
Kadungan pa nga nagahilapit ang summer season, panugyan ni Malacad nga dapat kuntani buligan ang transport industry nga makabangon.
