Gindiskusyunan na sang Department of Education Division of Bacolod City kag sang mga opisyales sang ciudad ang pagresume sang limited face-to-face classes subong nga ginpaidalom na ang Bacolod sa Alert Level 2.
Sa interview sang Bombo Radyo kay Bacolod City Councilor Renecito Novero, chairman sang committee on education sa Sangguniang Panlungsod nga miyembro man sang Local School Board, nakigsapol ini kahapon kay assistant schools division superintendent Peter Galimba kag sa presidente sang tanan nga public schools sa ciudad agud istoryahan ang resumption sang face-to-face classes.
Suno kay Novero, may memorandum si DepEd Secretary Leonor Briones nga nagapahanugot sang resumption sang limited face-to-face classes basta masunod lang ang mga requirements.
Ang in-person classes suno kay Novero kaangay sang yara sa Alangilan National High School ang sarang gid nga makaresume basta aprubado lang sang DepEd kag sang local government unit.
Samtang nagapati naman ang konsehal nga magadepende sa sitwasyon kun mabalik na ang face-to-face graduation bangud aminado ini nga nahidlaw na ang mga estudyante kag ginikanan sa kaangay nga set up sa tagsa nga matapos ang school year.
Suno kay Novero, padulong na gid man ang Pilipinas sa new normal bangud indi pwede nga matinir sa sini nga sitwasyon sa malawig nga panahon.
Nagresume naman ang limited face-to-face classes sa mga pilot sites sa Negros Occidental subong nga ginpaidalom ang probinsya sa Alert Level 2.
Sa interview sang Bombo Radyo kay Ian Arnold Arnaez, public information officer sang DepEd Division of Negros Occidental, nagbalik na ang face-to-face classes sa Valladolid National High School kag tatlo ka iban pa nga eskwelahan.
Sa karon, 16 na ka eskwelahan sa nasakupan sang DepEd Division of Negros Occidental ang nakapavalidate sa ahensya agud nga makapatigayon sang in-person classes kag kwalipikado na ang mga ini.
Isa sa mga guidelines sang DepEd amo ang zero COVID case sa sulod sang 28 ka adlaw.
Kinahanglan naman sang parent’s consent agud nga makabalik ang mga estudyante sa classroom.
Sa karon, wala pa man sang guidelines sa face to face graduation bangud madugay pa man magsira ang school year kag second half pa lang sang academic year subong.
Sa tion nga magbalik na ang face-to-face classes, nagalaom ang Division Office suno kay Arnaez nga imaximize sang mga estudyante ang ini nga kahigayunan agud nga makatuon sang maayo.
