Gin-engganyo sang chairman sang committee on education sa Sangguniang Panlungsod ang sin-o man nga may ebidensya nga overpriced ang choco milk drink nga ginpanagtag sa mga elementary students sa ciudad sang Bacolod nga magpasaka sang kaso.
Sang Pebrero 14, ginturnover sang city government sa DepEd Division of Bacolod ang 1.2 million nga choco milk drink paagi sa seremonya nga ginpatigayon sa Corazon Locsin Montelibano Elementary School.
Ang choco milk drink ang ipanagtag sa 16, 918 recipients sa sulod sang 71 ka adlaw kun sa diin ang kada recipient ang makabaton sang 71 ka beverage.
Sa kabug-usan, 46 ka public elementary schools sa Bacolod ang makabaton sang choco milk drink.
Apang kahapon, naglapta sa social media ang alegasyon nga overpriced ang beverages para sa mga pupils.
Sa interview sang Bombo Radyo kay Bacolod City Councilor Renecito Novero, mahapos lang maghimo sang issue nga overpriced ang choco milk gani ginaengganyo sini ang nagapagwa sang alegasyon nga mafile sang kaso batok sa mga opisyales nga ila ginapatihan nga nakasala.
Suno kay Novero, P24 million ang pondo nagikan sa Special Education Fund nga ginpain para sa proyekto nga nagatuyo nga mahatagan sang dugang nga nutrisyon ang mga kabataan, apang P22 million lang ang nagasto para sa 1.2 million packs sang choco milk drink.
Ang sahi sang beverage ang ginbakal santo sa requisite nga gintalana sang doktor sang Division Office kag naglabay ini sa husto nga bidding process.
Suno kay Novero, wala na sang kahilabtanan ang mga city officials sa bidding bangud may yara sang Bids and Awards Committee nga mas makasabat sang akusasyon.
