Indi pa kampante ang gobernador sang probinsya sang Negros Occidental sa pagdula sang implementasyon sang curfew karun nga naganubo na ang kaso sang COVID-19.
Suno kay Negros Occidental Governor Eugenio Jose “Bong” Lacson, sa karun indi pa ini komporme sa pagdula sang general public curfew apang positibo naman ini nga maga-abot ang tion nga ini ang mabatak na.
Pasalig sang gobernador nga mahimo gid mabatak ang curfew sa general public kun magnubo nagid ang COVID-19 infections, apang indi naman malakip sa batakon ang mga curfew nga ginapatuman sang tagsa ka local government unit (LGU) antes paman ang pagluntad sang pandemic, partikular na ang curfew para sa minors.
Nahibaluan nga sa pagpatuman sang curfew, madamo man sang mga negosyo nga naapektuhan ilabi na ang mga negosyo nga nagaganar kun gab-i kaangay sang mga restobar.
Apisar sa pagpanaog sang Alert Level Status sang probinsya sa Alert Level 2, paathag ni Lacson nga igakonsiderar ang pagdula sang curfew sa tion nga magpanaog na ang probinsya sa new normal.
Suno pa kay Lacson bisan ang head sang National Task Force on COVID-19 nga si Secretary Carliton Galvez ang indi man kumporme kalakip na ang pagpalos sang facemask.
Ini ang ginalantaw nga mahimo lang sa tion nga magpanaog nalang sa endemic ang pandemic.
