Desidido ang Bacolod City Emergency Operations Center nga dakpon ang iban pa gid nga nagahimo sang peke nga vaccination cards.
Nahibaluan nga kahapon, anom ka indibidwal lakip ang isa ka pastor ang nadakpan nga nagagamit sang peke nga vaccination card sang nagpahimo ang mga ini sang vaccination certificate sa help desk sang ciudad.
Sa interview sang Bombo Radyo kay Dr. Chris Sorongon, deputy for medical sang EOC, madamo ang vaccination sites sa ciudad nga sarang makadtuan sang luyag magpabakuna batok sa COVID.
Indi naman magnubo sa 1,000 ang numero sang mga pumuluyo nga mabakunahan kada adlaw.
Nagapadayon naman sa karon ang COVID vaccination sang mga kabataan nga nagaedad 5 tubtub 11 anyos kun sa diin vaccination site ang halos tanan nga ospital kag may yara man sa pribado nga mga eskwelahan.
Ginkalipay naman sini nga number one ang Bacolod sa pediatric rollout sa Western Visayas.
Suno sa EOC official, luyag naman sang mga kabataan nga magbalik ang face to face classes kag kinahanglan ang bakuna agud nga magbalik na sa normal ang pagpangabuhi.
Sa karon, nabakunahan na ang 122 porsyento sang target population ukon 93 porsyento sang total population sang ciudad.
Target naman sang EOC ang mg anti-vaxxers sa ciudad.
Suno kay Sorongon, ang nadakpan nga fake vaccination cards kahapon ang pareho lang sa nauna nga nadakpan tinalikdan nga bulan sa Cuadra Street gani ginapatihan nga isa lang ang nagahimo sini apang pila ka lugar ang ila nga ginapwestuhan.
Suno sa EOC deputy, dapat madakpan ang iban pa nga nagahimo sang fake vaccination cards.
