Nagapanindugan ang chairman sang Bids and Awards Committee (BAC) sang ciudad sang Bacolod nga indi overpriced ang choco milk drink nga ginbakal sang city government kag ginturnover na sa Department of Education agud ipanagtag sa elementary pupils.
Madumduman nga P22 million ang balor sang 1.2 million packs sang choco milk drink.
Suno kay Atty. Maphilindo Polvora, ang presyo sang ginbakal nga produkto ang manubo pa sa contract price.
Suno kay Polvora, may ginasunod nga proseso ang BAC sa tion nga may iendorso ang end user nga ipabidding.
Ang end user sang nagpabid sang choco milk kun sa diin sila ang nagapasa sa BAC sang documents kalakip na ang purchase order.
Suno kay diri, DepEd man ang naghatag sang amount para sa bidding kalakip na ang brand nga pagabaklon.
Ginakonsiderar man sang BAC ang track record sang bidder kaangay sang financial capacity, manufacturing capacity kag delivery capacity.
Gin-athag man sini nga indi dapat pagbasehan ang SRP sang produkto bangud may yara pa sang ginabayaran ang kompaniya kaangay sang tax kag iban pa.
Kasubong man nga ginakonsiderar man ang mark-up sang kompaniya.
Ginasiguro man sang BAC nga indi block listed ang bidder bangud ang mga ini ang wala na ginapahanugot nga magpasakop sa bidding.
Ginaaward man ang bid sa lowest price bidder gani categorically indi mahambal nga overpriced ang pagbakal sang gatas para sa mga kabataan sa syudad sang Bacolod.
