Naghingyo ang Task Force Disiplina sa mga kandidato kag sa mga supporters nga indi magbutang sang campaign posters sa indi designated area.
Nahibaluan nga nagaupod ang Task Force Disiplina sa City Legal Enforcement Team sa pagpangkakas sang posters sa poste sang kuryente kag malapit isa na ka bulan ang ini nga operation.
Ini ang pagsunod sang tripartite agreement sa tunga san Bacolod City government, Central Negros Electric Cooperative kag Bacolod City Police Office nga kakason ang mga campaign materials sa electrical utilities.
Suno sa pinuno sang Task Force Disiplina nga si Wilfredo Geolingo, supot na ang kadamuon sang ginbaklas nga campaign materials bangud wala man sang pili sa ginakakas.
Wala naman sang may nagreklamo magluwas lamang sa City Heights Subdivision nga nagpamangkot ang supporters apang ila man naintindihan sang ginpaathagan nga yara ang posters sa electrical utilities.
May ginkakas man nga campaign materials sa sulod sang Vendors Plaza.
Suno kay Geolingo, ginapanag-iyahan sang city government ang Vendors Plaza kag ang Bacolod City public plaza gani indi pwede ini butangan sang campaign materials.
Wala naman ginatandog sang enforcement team ang posters sang mga national candidates nga yara sa puno sang kahoy bangud lain man nga ahensya sang gobyerno ang in-charge diri.
Nagalaom naman si Geolingo nga mangin responsable ang publiko kag indi na magbutang sang posters nga ginadumilian nga lugar bangud madamo pa sang iban nga trabaho ang Task Force Disiplina.
