Pilason ang isa ka lalaki matapos nga ginbuno sang iya man mismo nga pakaisa sa Sitio Igababais, Barangay Buluangan, San Carlos City, Negros Occidental.
Ang biktima ang ginkilala kay Domingo Baya samtang ang suspetsado naman ang ginkilala kay Jose Jerry Fajardo lunsay mga mangunguma sa nasambit nga lugar.
Suno kay P/Lt Roby Aurita, deputy chief sa San Carlos City Police Station, 1st cousin gid sang biktima ang nagbuno sa iya apang may daan na ang mga ini nga hiligut-anon.
Santo sa pahayag sang biktima nga ginbulong sa karun sa ospital nga sang nakaligad mag ginpatigayon ang mga ini nga pagbaligya sang kahoy kun sa diin may nagluntad nga paglansihanay sa income ukon indi patas ang tungaay.
Apang sang nakaligad nga gab-I, samtang si Baya ang nagapauli kun sa diin malabayan sini ang balay ni Fajardo, ginapahayag sang biktima nga siya ang ginbantayan sang suspetsado.
Sa aligasyon sini, ginpalukpan siya ni Fajardo sang boga nga may-bala nga holen, apang wala siya maigo kag nahimo pa sini nga maagaw ang armas.
Apang wala ini nakahibalo nga may kutsilyo pa nga ginahuptan ang suspetsado gani siya ang ginbuno Nsang makapila ka beses.
Ginapahayag man nga naggwa gid ang pila ka mga kaundan sang biktima bangod sa malala nga pagpamuno gani nga tubtob sa karun yara pa ini sa isolation sa San Carlos City District Hospital.
Sa karun ginahulat pa sang San Carlos City Police Station ang medical bulletin sang biktima, agud mahibaluan man kun pila ka buno ang gin-agum sini, samtang ginapasalig naman ni Aurita nga makasugilanon na ini sang imbestigador.
Ang suspetsado ang una naman nga nagpalagyo matapos sang insidente apang ginpakamaayo man nga magsungka.
Sa karun yara na si Fajardo nakahunong sa custodial facility sang San Carlos City Police Station.
Desidido naman ang biktima nga pasakaan sang kaso ang iya nga pakaisa, nga mahimo magpangatubang sang kaso nga “frustrated murder”
