Indi pa mahambal sang San Carlos City Police Station kun nasal-an lang sang mga suspetsado ang nagasakay sa Mazda3 nga gin-ambush sa Villa Lina, Barangay Palampas, ciudad sang San Carlos kahapon sang aga kun sa diin tatlo ang patay kag isa ang pilason.
Madumduman nga nagasakay sa puti nga Mazda3 sanday Andre Fajardo, 18-anyos, residente sang Ylagan, extension, Barangay 6; Russel Bucao, 40-anyos, kasado, residente sang Urban Phase 1, Brgy. Rizal; Rudy Dela Fuente, 51-anyos; kag Renante Chiu, 27-anyos, lunsay residente sang San Juan Baybay, San Carlos City.
Tadtad sang bala ang awto gani dead on the spot sanday Fajardo kag Bucao samtang dead on arrival sa ospital si Dela Fuente.
Sa karun, nakaconfine pa sa San Carlos City Hospital si Chiu kag yara sa kritikal nga kondisyon matapos nakaagom sang madamo nga igo sang bala.
Sa interview sang Bombo Radyo Bacolod kay Police Lt. Roby Aurita, deputy chief sang San Carlos City Police Station, natapos na sang Scene of the Crime Operation (SOCO) ang pagproseso sa crime scene kag natigayon nga marecover ang 58 ka fired cartridge sang 5.56 mm kag isa ka fired slug sang caliber .45.
Isa ka anggulo sang imbestigasyon sa karun kun may kaangtanan sa illegal nga druga ang pag-ambush sa mga biktima.
Gina-imbestigaran man sang mga kapulisan sa syudad sang San Carlos kun mistaken identity ang natabo nga pag-ambush bangud indi sakay sa awto ang tag-iya nga si Alyas Iraq.
Ginakasubo man sang San Carlos City Police Station ang insidente bangud ang ambush ang natabo nga duha ka oras makaligad nga magpull out sa lugar ang mga police personnel nga nagpatigayon sang Comelec checkpoint.
