May panawagan ang tagpamaba sang Negros Occidental Police Provincial Office (NOCPPO) sa tanan nga may yara sang impormasyon sa may kahimuan sa pag-ambush sa pribado nga salakyan sa Villa Lina, Brgy. Palampas, San Carlos City, Negros Occidental kahapon sang aga kun sa diin tatlo ang patay samtang isa ang pilason.
Sa interview sang Bombo Radyo Bacolod kay Police Lt. Abegael Donasco, wala sang kahadlok ang mga naghimo sang ambush sa syudad sang San Carlos kahapon apisar nga masanag kag mahimo nga may makakita.
Suno kay Donasco, ginapalab-ot man sang provincial director sang NOCPPO nga indi makapalagyo sa layi ang may kahimuan sa krimen bangud sa tion nga madakpan, pasakaan sila sang kaso nga multiple murder.
Ginpahayag man sini nga isolated case ang natabo nga ambush sa syudad sang San Carlos.
Sa karun, padayon pa ang imbestigasyon sang mga otoridad sa natabo nga ambush agud matumod ang motibo kag may kahimuan sang krimen.
