Ginabanta nga nagdangat sa P450,000 ang balor sang halit nga gintuga sang sunog nga nagluntad sa balay sang isa ka manunudlo sa Phase 1, Charito Heights Subdivision sa Barangay Granada, ciudad sang Bacolod kaina sang aga.
Sa interview sang Bombo Radyo Bacolod kay Senior Fire Officer 1 John Stewart Mondido, arson investigator sang Bacolod City Fire Station, may nagpadulong sa fire station alas-8:10 sang aga sa Barangay Granada nga agud magpahibalo nga may yara sang nagluntad nga sunog sa nasambit nga lugar.
Gilayon man sang mga ini nga ginrespondehan ang nasambit nga fire incident.
Suno kay Mondido, ang kalayo ang nagsugod sa isa ka kwarto sang balay apang wala pa matumod ang gintunaan sang sunog.
Totally damage ang balay kag padayon pa ang imbestigasyon sa nagluntad nga sunog agud matumod ang ginhalinan sang kalayo.
Suno sa tag-iya sang nasunog nga balay nga si May Dayot, nasubuan ini bangud wala sang nabilin sa ila mga kagamitan bangud gintupok ini sang kalayo kalakip na ang ila mga papeles.
Suno kay Dayot nga Math teacher sa Angela Gonzaga National High School sa Barangay Granada, apat ka mga kabataan sang mga ini nga nagaedad sang 15 anyos; 11 anyos; 9 anyos kag anum ka tuig ang nabilin sa ila balay sang nasunog ini.
Suno kay Dayot ang anum ka tuig nga bata ang nakakita sang kalayo kag ginpahibalo ang mga utod kag nagwa man ang ini.
Suno diri wala man ginalock ang pwertahan sang balay kag nakahibalo man ang mga ini sang pin sang kandado sa gate gani nakagwa man ang mga ini kag ginbuligan man sila sang ila mga kaingod.
Ginalantaw man sini nga sa extension wire nga ginasaksakan sang aquarium ang ginhalinan sang kalayo nga nagtuga sang sunog.
Wala man ang mag-asawa sa ila balay sang nagluntad ang sunog bangud lunsay nagatrabaho ang mga ini.
Nagpasalamat man ang sang punong barangay sang Barangay Granada nga wala sang may nasamaran sa nagluntad nga sunog.
Suno kay Punong Barangay Alfredo Talimudao, may nagpahibalo sa iya nga may nagluntad nga sunog kag ginpasalamatan man sini ang gilayon nga pagresponde sang mga bumbero kag wala na nagdako pa ang sunog.
