Dakop ang isa ka babayi nga katapo sang Anak Bayan kag ginapatihan miyembro sang Communist Party of the Philippines – New People’s Army (CPP-NPA) sa ginpatigayon nga joint operation sang Isabela Municipal Police Station kag 303rd Infantry Brigade sang Philippine Army sa pag-issue kuntani sang warrant of arrest kay Juanito Magbanua nga isa sa mga commander sang hublag kag amo ang nagapagwa sang mga press release sang rebelde nga grupo sa Western Visayas.
Suno kay Brig Gen. Inocencio Pasaporte, commander sa 303rd IB, ginpatigayon nila ang joint operation sang Sabado sa Barangay Camang-Camang, Isabela, Negros Occidental.
Ang naaresto ang ginkilala kay Harlyn Balora nga may mga alias nga Karyle kag Cristel, 26 anyos, residente sa Libertad St. Barangay 40, Bacolod City.
Paathag ni Pasaporte nga ang operasyon ang ginpatigayon sang Isabela PNP kag nagkoordinar lang sa ila, ilabi na nga ang mga ini ang nagahupot sang mga impormasyon may kaangtanan sa mga katapo sang CPP-NPA.
Apang sa pagserbe sang warrant of arrest, si Juanito Magbanua ang nahimo nga makapalagyo, samtang nakita naman sa lugar si Balora gani ini ang gin-aresto.
Nagapati ang Philippine Army ang front sang CPP-NPA ang grupo nga Anak Bayan.
Dugang pa sini nga bisan ginapanindugan ni Balora nga indi siya katapo sang NPA, apang maathag na nga ini ang miyembro sang terorista nga grupo ilabi na nga yara ini sa lugar ni Magbanua.
Ginalantaw man ni Pasaporte ang posibilidad nga mahimo katapo ini sa Anak Bayan sadto apang nagsulod na sa armado nga pagpakigbato.
Dako man ang posibilidad nga si Balora ang kaupod ni Magbanua sa paghuman sang mga press release nga ginapagwa sang CPP-NPA.
Aminado naman ang Army Commander nga madamo na sang mga incident report kun sa diin ang mga pamatan-on ang nagakabiktima sang sala nga ideolohiya kag nagasulod sa rebelde nga grupo.
Sa pihak nga bahin, kadungan sa pagkadakop kay Balora, narecover man gikan sa balay ang mga armas-luthang kag iban pa nga mga pagkabutang may kaangtanan sa kumunista nga grupo.
Bangod sini, ang suspetsado ang pasakaan sang kaso nga illegal possession of firearms kasubong man ang Comelec Gun Ban.
Sa karun padayun man ang hot pursuit operation sang mga kapulisan kag militar sa nagpalagyo nga si Juanito Magbanua.
