29 ka mga pamalay ang natupok sang kalayo samtang duha ang partially-burned sa nagluntad nga sunog sa Sitio Dacutan Dako, Barangay Mambulac, Silay City, Negros Occidental, kaina sang udto.
Nakaangkon man sang kabudlayan ang Bureau of Fire Protection (BFP) kag iban pa nga mga fire trucks nga nagresponder sa sunog bangod sa naga-inikit-ikit nga mga puluy-an.
Agud nga makapenetrate ang mga bombero, iban sa mga ini ang nagsaka na sa mga atop sang mga pamalay agud nga makabomba sang tubig sa mga nagakasunog nga pamalay.
Kalabanan naman sa mga pamalay ang human sa light materials gani madasig ang paglapta sang kalayo.
May isa naman ka puluy-an nga ginatudlo ginhalinan sang kalayo, matapos nga may nabatian nga naglupok ang mga pumuluyo.
Wala naman natumod kun ano ang naglupok gikan sa nasambit nga balay.
Pahayag ni Mila Balberde, 73 anyos, nagapanyaga sila sang nag-umpisa ang sunog.
Nautod naman ang ila nga panyaga sang may nagsinggit nga kaingod nga may nagaluntad nga sunog gani ginhingagaw gilayon sang mga ini nga masalbar ang ila nga mga kagamitan.
Suno diri, may tatlo ka iban pa nga naga-arkila sa balay apang nagatrabaho gani wala nakahibalo nga may nagluntad na nga sunog.
Samtang ang mga kabataan naman sini ang nagabulig man sa pagpanghakot sang tubig kag sa pagpatay sang kalayo.
Samtang ginpasalamat naman ni Josephine Daya, 43 anyos, nga wala naulamid ang ila balay sa sunog.
Suno diri nakibot nalang sila nga tuman na ang pagdabadaba sang kalayo, kun sa diin gamay nalang magadangat na ini sa ila nga balay.
Gilayon man sila nga naghakot sang tubig agud nga magbulig sa pagbasya agud mapatay ang kalayo apang wala sila sang nahimo bangod sa madasig nga paglapta sang sunog.
Agud nga makaseguro, gilayon man sang mga ini ginhakot ang ila nga mga kagamitan kaupod sa iya dalaga nga anak, kag gindala sa gwa nga bahin sang Sitio Dacutan Dako
Sa karun ginahulat pa ang assessment sang BFP kun ano ka dako ang nangin kahalitan sang nagluntad nga sunog.
