Ginpahayag sang punong barangay sang Barangay Mambulac, Silay City, Negros Occidental nga temporaryo nga igahamtang sa Mambulac Elementary School ang masobra 20 ka pamilya nga nadulaan sang balay sa nagluntad nga sunog sa Sitio Dacutan Dako.
Nagdangat sa 29 ka pamalay ang totally damaged samtang duha ang partially damaged bangod sa sunog.
Nagpasalig si Punong Barangay Hazel Cordero, nga may mahatag sila nga foodpacks bangod ang Barangay Mambulac ang may napreparar na nga mahimo mahatag sa tion sang disasters.
Dugang pa ni Cordero nga nagpasalig naman sang bulig si Silay City Mayor Mark Golez sa mga nahalitan sang sunog.
Ang mga pamalay ang human sa light materials kag sa karun padayun paman ang imbestigasyon sang Bureau of Fire Protection (BFP) sa mahimo gintunaan sang sunog.
Apang suno kay Cordero, ginapahayag sang mga pumuluyo nga electrical wire nga gamit sa appliances ang nasunog nga gintunaan sang pag-ibwal sang kalayo.
Ang mga nasunugan ang gindala as Hofelinia Grand Stand para sa briefing kag ang mga ini ang gilayon man nga ginpahamtang sa Mambulac Elementary School.
Nagpahayag man ang mga biktima nga kinahanglan sang mga ini ang pagkaon kasubong man ang beberon para sa mga kabataan, gani gilayon man nila ini nga ginbaklan.
Paathag ni Cordero nga kinahanglan ang pagbuligay sa kaangay nga trahedya kag dako ang pagpasalamat sini nga nakita gid ang bayanihan sa mga residente kalakip na sa kaingod nga purok nga nagbulig man sa pagpapas sang kalayo.
Nakabulig man suno diri ang taob bangod nangin mahapos ang paghakot sang tubig sang mga pumuluyo gikan sa baybay.
Ginpasalamatan man sang Punong Barangay ang madasig nga pagresponder sang mga bombero gani wala na naglala pa ang sunog sa Sitio Dacutan Dako nga ginabug-usan sang 2,000 nga populasyon.
