Aminado ang fire investigator sang Silay City Fire Station nga madugay na nag-umpisa ang kalayo sa Sitio Dacutan Dako, Barangay Mambulac, Silay City kahapon sang udto antes napahibalo sa ila gani dako na ang ginlamon sang kalayo.
Suno kay Fire Officer 1 Melvin Juzon, 31 tanan ka mga pamilya ang apektado kun sa diin 29 ka pamalay ang totally damaged samtang duha naman ang partially damaged.
Ginabanta naman nga nagadangat sa P500,000 ang balor sang kahalitan sang sunod apang ini ang indi pa masegurado bangod ginahulat pa ang deklarasyon sang mga biktima nahanungod sa balor sang ila propidad nga ginlamon sang kalayo.
Ginapasalamat man sang mga katapo sang BFP-Silay City Station nga wala sang casualties sa nagluntad nga sunog.
Samtang wala pa sa karun matumod ang orihinal nga gintunaan sang sunog apang santo sa mga pumuluyo, nga nag-umpisa ang kalayo sa balay nga nahamtang sa sentro sang sunog.
Magluwas sa mga pahayag sang pumuluyo bisan ang mismo nagapuyo sa nasambit nga balay ang nagkompirmar man nga didto nag-umpisa ang kalayo.
Nahibaluan nga alas-12:00 sang udto sang may nabatian ang mga pumuluyo nga may naglupok kag ini ang ginsundan na sang pag-ibwal sang kalayo.
Napahibalo naman ang sunog sa BFP takna alas-12:25 sang udto gani pag-abot sang mga bombero, madamo na ang nalamon sang kalayo.
Suno kay Juzon, ang kalayo ang nadeklarar nga under control ala-1:39 kag na fire-out ala-1:56 sang udto.
Suno kay Juzon ginakasubo man nila nga makita ang mga pumuluyo nga madulaan sang puluy-an.
Gani panugyan sini sa mga pumuluyo nga maghalong kag likawan ang mga butang nga masami ginatunaan sang sunog.
Kalakip na diri ang mga napabay-an nga kandila, jumper sang kuryente, paggamit sang substandards nga mga electrical wires kasubong man bantayan ang mga kabataan nga indi maghampang sang kalayo.
