Ginapreparahan na sa syudad sang Bacolod ang posibilidad sang pagbukas na sang limited face-to-face classes karun nga padayun nga naganubo ang kaso sang COVID-19.
Suno kay Bacolod City Councilor Renecito Novero, chairman sa Committee on Education sa Sangguniang Panlungsod ginalantaw na sini nga malapit nalang malab-ot sang syudad ang lebel sang normalcy.
Sa tion nga ini ang mahitabo, sarang naman nga mabalik ang face-to-face classroom instructions.
Agud nga ini ang mapreparahan, nagdiskusyon na ini kaupod sa mga manunudlo natuhoy sa pagpreparar sang mga classrooms.
Kasubong man nga ginapapreparar na sini ang mga buluthuan para sa May 9 Elections apisar nga indi ang medyo malayo pa.
Paathag sang konsehal nga mas maayo kun preparado ang syudad.
Sa karun, nakabalik naman ang face-to-face classes sa Alangilan National Highschool sang Lunes.
Suno diri, ila naman nga ginrekomendar sa face-to-face classes ang pila pa ka eskwelahan sa Barangay Alangilan nga ginalakipan sang Arceo Elementary School, Alangilan Elementary School, Rafael Alunan Elementary School kag Fr. Gratian Murray Integrated School para sa masunod nga expansion sang programa.
Paathag naman ni Novero nga wala nagakahulugan ang mga nasambit lang nga buluthuan ang mahimo nga makapatigayon sang masunod nga implementasyon sang face-to-face classes.
Suno sa konsehal, sarang man nga makarekomendar pa sang dugang nga mga buluthuan gikan sa iban nga mga barangay sa syudad apang dapat paborable ang COVID-19 situation sa nasambit nga barangay samtang nagakinahanglan naman sang endorsement gikan sa barangay kasubong man ang pag-ugyon ni Bacolod City Mayor Evelio “Bing” Leonardia.
