Nagpalab-ot sang pagpakig-unong ang gobernador sa Negros Occidental sa pagtaliwan sang anay 4th District Congressman nga si Carlos “Charlie” Cojuangco sa edad nga 58 anyos.
Nahibaluan nga si Charlie Cojuangco nga anay alkalde man sa banwa sang Pontevedra ang sa karun incumbent 1st District Representative sa Tarlac.
Suno kay Negros Occidental Governor Eugenio Jose “Bong” Lacson, naga-upod ini sa kalisod kag nagapakig-unong sa nabilin nga pamilya Cojuangco.
Gindumdom man sini ang mga tion nga nakaupod sini sa pagserbisyo sa probinsya si Cojuangco kasubong man ang mga hinimuan sini para sa probinsya.
Si Charlie Cojuangco nga bata sang anay business tycoon nga si Eduardo ‘Danding’ Cojuangco ang nahibaluan nga na-ospital matapos ang aksidente sa isa ka drag race sa Clark, Pampangga sang Oktobre, 2021.
Ini ang nagpabilin nga nakaconfine sa ospital kag nadiagnose nga may brain aneurysm tubtob sa ini ang ginbawian na sang kabuhi kahapon.
Suno kay Lacson, apisar nga indi masami ang komunikasyon nila ni Cojuangco, sa tion nga sila ang mag-updanay, masami gihapon nila nga gina-estoryahan ang nahanungod sa progreso sang Negros Occidental, bisan sang ini ang kongresista na sa Tarlac.
