120 ka mga kapulisan nagikan sa Bacolod City Police Office (BCPO) ang gindeploy agud nga maghatag sang seguridad kadungan sang pagpatigayon sang rally sang Sara-BBM Uniteam.
Sa interview sang Bombo Radyo Bacolod kay Police Lt. Col. Sherlock Gabana, tagpamaba sang BCPO, pagapangunahan ni BCPO city director Col. Thomas Joseph Martir ang mga kapulisan nga gindeploy sa rally area kag assisted sang staff officers.
May yara naman sang 60 ka mga personnel nagikan sa Bacolod City Traffic Authority Office (BTAO) nga nagpasiguro sang maayo nga dalagan sang trapiko sa mga dalan nga ginlabayan sang caravan.
Ginbanta naman nga nagdangat sa 20 tubtob 30mil ka mga tawo ang nagkadto sa rally bangud sa bilog nga probinsiya ang ginalauman nga magtambong.
Gindumilian man sa mga nagkadto ang pagdala sang bladed ukon pointed weapon, gindumilian man ang pagbitbit sang lighter bangud wala man ginapahanugutan ang pagpanigarilyo sa lugar bisan nga open ang venue.
Gin-obserbar man ang pagsuksok sang facemask kag social distancing bangud nagapangatubang sa gihapon syudad sang pandemya.
