30 tubtob 50 ka mga katapo sang Task Force Disiplina kag City Legal Office sang Bacolod City ang gindeploy para sa pagpatuman sang minimum health protocols kadungan sang pagpatigayon sang BBM SARA rally sa syudad.
Sa interview sang Bombo Radyo Bacolod kay Task Force Disiplina Team Leader Wilfredo Geolingo, kinaandan na nga sa halos tanan nga mga aktibidades nga ginapatigayon sa syudad yara ang task force sa pagpatuman sang health protocols batok sa COVID-19.
Suno kay Geolingo masami nga ginahimo sang task force ang pagremind sa mga pumuluyo nga magsunod sa pagsuksok sang facemask kag pagsunod sa social distancing agud mangin madinalag-on ang syudad sa pagpakigbato sa COVID-19.
Magaissue naman ang mga ini sang citation ticket sa multa nga P250 kag community service nga indi maglapaw sa walo ka oras.
Nagapangabay man si Geolingo nga disiplinahon ang kaugalingon agud nga mapadayon na ang pagnubo sang kaso sang COVID-19 sa syudad.
Aminado man ini nga may kabudlayan apang ginahimo lamang sini ang ila nga masarangan agud nga mapabilin nga ginasunod ang minimum health protocols.
