Ginpasiguro sang Police Regional Office 6 nga hugot ang pagpatuman sang Election Gun Ban sa mga probinsya sa Western Visayas.
Sa interview sang Bombo Radyo Bacolod kay Police Regional Office 6 (PRO-6) Spokesperson Police Lt. Col. Arnel Solis, ginpasanyog nila ang ginapatigayon nga mga checkpoints angot sa nagahilapit nga eleksyon.
Suno kay Solis, ginakonsiderar ang pagbutang sa isa ka area sang checkpoint apang wala ini ginalimitahan sa isa ka lugar lamang samtang nakadepende naman ang kalawigon sang pagtinir sang mga kapulisan sa checkpoints sa desisyon sang tagsa ka unit commander.
Paagi sa mga checkpoints, ginpasiguro sang tagpamaba nga dako ang mabulig sini sa pagtapna sang krimen nga mahimo sang mga kriminal nga nagalabay sa checkpoints.
Ginpahayag man sini nga may ginarequire nga numero sang PNP personnel sa kada checkpoints sa pihak sang kakulangan sang mga kapulisan sa rehiyon.
