Ginhanduraw sang participant sa EDSA People Power Revolution ang iya personal nga eksperyensya sang nag-upod ini sa bloodless revolution 36 na ka tuig ang nakaligad.
Sa interview sang Bombo Radyo kay Benedicto Gabon nga nagaedad pa lamang sang 22-anyos sang 1986, malapit lang sa EDSA ang ila nga balay gani nang-usyoso ini sang ginbalita nga nag-amat-amat na damo ang mga tawo sa malaba nga dalanon.
Sang yara na EDSA si Gabon, nabatyagan sini ang espiritu sang paghugpong sang mga Pilipino gani nadala ini sang unity.
Pagkasunod nga adlaw, nagbalik si Gabon sa EDSA kaupod ang iya mga barkada, indi agud mang-usyoso, kundi magsuporta sa mga Pilipino nga nagapanawagan kay anay Presidente Ferdinand Marcos nga magpanaog na sa pwesto.
Antes ang People Power Revolution, wala si Gabon nagapasilabot sa pulitika bangud sa ginahimo sang Marcos administrasyon batok sa mga aktibista.
Samtang nga ara sa EDSA, nabatyagan ni Gabon ang kasadya ukon mainabyanon ang palibot, nagaistoryahanay, nagarosaryo, nagahatagay sang pagkaon kag mabatyagan ang pagpalangga sa isa kag isa walay sapayan sang pagtuluuhan.
Suno kay Gabon, tuman nga kalipay ang ila nga nabatyagan bangud sila ang nagalaom nga may pagbag-o na sa Pilipinas kag mapahalin na sa pwesto si Marcos kag ang iya mga salaligan.
Subong nga adlaw, nagbantay naman ang Task Force Disiplina sang Bacolod sa mga hublag-protesta.
Nag-apela naman ang pinuno sang task force nga si Wilfredo Geolingo sa mga makigbahin nga sundon ang minimum health protocols kaangay sang pagsuksok sang face mask.
