Naghugpong ang nagkalain-lain nga mga grupo agud magpatigayon sang caravan kag open manifestation sa Bacolod sa tinutuyo nga mapahibalo sa mga pumuluyo ang ila nga diretso angot sa COVID vaccination.
Sa interview sang Bombo Radyo kay Atty. William Mirano nga isa man ka X-Man ukon No to Mandatory Vaccination advocate, masobra 80 ka salakyan ang nag-upod sa caravan nga naglabay sa pila ka bahin sang ciudad kag nagpundo sa Bacolod City Public Plaza para sa open manifestation.
Nagikan naman sa nagkalain-lain nga sektor sa sosyodad ang nag-upod sa caravan.
Sa plaza, nag-uyat ang mga participants sang streamers nga may nakasulat nga mga tinaga nga nagapamatok sa mandatory vaccination kaangay sang NO VAX, NO JOB IS ILLEGAL kag iban pa.
Suno kay Mirano, luyag niya ipahibalo sa publiko nga may yara sila sang diretso sa idalom sang Republic Act 11525 ukon COVID Vaccination Act of 2021 nga indi mandatory ang vaccination kag indi ini requirement sa trabaho ukon anuman nga transaction sa gobyerno.
Panindugan ni Mirano, wala sila sang political color, leaning ukon agenda kundi nagapahibalo lang sa mga pumuluyo nga sundon ang layi kag indi compelled ang mga Pilipino nga magpabakuna.
Suno sa abugado, wala pa nahibaluan ang epekto sang bakuna sa lawas ilabi na nga indi mag-ako ang mga pharmaceutical companies sang layabilidad sa epekto sini sa lawas.
Ang mga kabataan naman suno kay Mirano ang indi dapat pagtublukan sang bakuna bangud indi mapaktan ang epekto sini sa ila lawas kag sila ang may yara pa sang bwas-damlag.
Ang 80-anyos nga si Mirano ang wala man nagpabakuna kag wala ini sang plano nga magpabakuna bangud indi niya luyag nga magsulod nga nagakatulog ukon buhi nga virus sa iya lawas.
