Nakahunong na sa karun sa Bacolod Police Station 7 ang guwardiya sang isa ka supermarket sa Barangay Mansilingan, Bacolod City matapos nga iya gintiro ang isa ka barker kahapon sang hapon.
Sa interview sang Bombo Radyo Bacolod kay Rolly Sedorio, 24-anyos sang Barangay Don Jorge Araneta, Bago City, naimpito na ini bangud sa paliwat-liwat nga pagyaguta sa iya sang biktima nga si Sergio Rivera, 36 anyos sang Hermelinda Homes, Barangay Mansilingan.
Suno kay Sedorio, masami siya ginahambalan sang biktima nga daw katikalon sa iya nga klase sang gwardiya kag ginapahog pa ini nga lambatan siya ni Rivera kag tiruhon.
Makapila man ini ka beses nga ginsaway sang suspetsado ang biktima nga ginadumilian ang barker sa supermarket apang wala ini nagapati.
Gin-aligar man ni Sedorio nga gintuyo pa ni Rivera nga agawon ang armas sini tubtub nga iya gintiro.
Naigo ni Sedorio si Rivera sa paa apang gilayon man nga gindala sa ospital agud madapatan sang nagakaigo nga pagbulong.
Gingamit sang suspetsado ang caliber .9mm issued firearm sini sa pagtiro sa biktima.
Ginhulat man sini nga kuhaon siya sang mga kapulisan matapos ang insidente.
Samtang, ginpahayag sang hepe sang Bacolod Police Station 7 nga ipaidalom sa paraffin test kag ballistic examination ang gwardiya.
Suno kay Police Captain Elmer Bonilla, nakita sa ila imbestigasyon nga may yara na sang daan nga hiligut-anon nga nagapatunga sa biktima kag suspetsado.
Suno kay Bonilla, ginahikot naman nila ang papeles para sa pagpasaka sang kaso apang ginahulat pa sang mga ini ang desisyon sang pamilya sang biktima.
