Nakagwa na sa capital sang Ukraine ang pila ka mga Pilipino kaupod ang ila employers duha ka adlaw matapos nga ginlusob sang Russia ang eastern European country.
Suno kay Bombo correspondent Joy Fernandez Tolentino, yara na sila sa karon sa Frankivsk, ikaduha nga ciudad nagikan sa Kyiv.
Suno kay Tolentino, nahamtang sa Frankivsk ang una nga airport nga ginbombahan sang Russian forces sang ginlusob sini ang Ukraine nagikan sa border sang Hwebes sang udto.
Nagsakay sanday Tolentino sa salakyan sang iya nga employer kag isa ka adlaw ang byahe sang mga ini nagikan sa Ukraine capital padulong sa Frankivsk.
Wala pa sang suldado sang Russia sa higad sang dalan halin sa Kyiv padulong sa Frankivsk bangud wala pa sila nakalampuwas sa capital apang yara ang Ukrainian soldiers kag police officers nga nagatigayon sang checkpoint operation.
Makaluluoy naman suno sa Pinay ang mga kabataan sang mga Ukrainians nga nagatulog sa kun diin sila malab-utan sang kadulom bangud nagalakat lang ang mga ini.
Sa karon, wala sang linupok nga mabatian sa Frankivsk apang nagapatigayon ang Russian forces sang airstrike sa Kyiv.
Nagdesisyon naman ang employer ni Tolentino nga indi na sila magpadayon sang byahe kundi magatinir nalang sa safe place sa Frankivsk bangud tuman kahinay ang dalagan sang mga salakyan kun sa diin ang orihinal nga 6-hour travel halin sa Kyiv padulong sa ila lokasyon subong ang naglawig sang isa ka adlaw.
Gin-untat man ang operasyon sang airport gani madamo ang stranded.
