Ginakalipay sang Executive Director sa Bacolod City Emergency Operation Center (EOC) nga new normal na ukon nagpanaog na sa Alert Level 1 ang COVID-19 status sang syudad sumugod subong nga adlaw, Marso 1.
Sa interview sang Bombo Radyo Bacolod kay Em Ang, ang ginabasihan sang Alert Level status amo ang numero sang kaso kag utilization rate sa mga healthcare facilities.
Dugang pa ni Ang nga dako nga factor kun ngaa nagnubo ang kaso kag ginpanaog sa Alert Level 1 ang Bacolod City ang tuga sang mataas nga porsyento sang vaccination.
Paathag sini nga 128 porsyento na ang nalab-ot sa population protection percentage sang syudad.
Nahibaluan nga ang 70 porsyento sang kabug-usan nga populasyon ang anay ginatawag nga herd immunity apang Population Protection naman ang 80 porsyento sang kabug-usan nga populasyon.
Pahayag ni Ang nga sa nasambit nga figures, wala pa nalakip sa mga ini ang data gikan sa vaccination sa edad 5 tubtob 11 anyos.
Pahayag sang EOC Executive Director nga kadungan sa pagpalos sang tanan nga restrictions, panugyan sini sa mga Bacolodnon nga segihon lang ang pagsunod sa minimum health protocols bangod indi sang mga ini luyag nga magbalik pa ang syudad sa mas mataas nga alert level status.
