Yara na sa estable nga kondisyon ang isa sa apat ka mga pasahero sang puti nga Mazda3 nga gin-ambush sa Villa Lina, Barangay Palampas, San Carlos City, Negros Occidental, sang Pebrero 20.
Madumduman nga nagasakay sa puti nga Mazda3 sanday Andre Fajardo, 18-anyos, residente sang Ylagan, extension, Barangay 6; Russel Bucao, 40-anyos, kasado, residente sang Urban Phase 1, Brgy. Rizal; Rudy Dela Fuente, 51-anyos; kag Renante Chiu, 27-anyos, lunsay residente sang San Juan Baybay, San Carlos City.
Tadtad sang bala ang awto gani dead on the spot sanday Fajardo kag Bucao samtang dead on arrival sa ospital si Dela Fuente.
Sa interview sang Bombo Radyo kay Police Lt. Roby Aurita, sa karun, nakaconfined pa sa San Carlos City Hospital si Chiu apang yara na sa estable kag kondisyon.
Sa interview sang Bombo Radyo kay Police Lt. Roby Aurita, deputy chief of police sang San Carlos City Police Station, makabig nga shooting incident ang natabo kag indi ambush bangud ang ini nga termino ang tuman ka harsh para sa ila kag ginagamit lamang para sa mga nagakontra sa gobyerno.
Sa karun blangko gihapon ang mga imbestigador sa identity sang mga suspetsado kag indi pa man makuhaan sang impormasyon si Chiu.
Nagapanawagan si Aurita sa nakakita sang insidente ukon sa mga witness nga magbulig sa pagsolbar sang krimen.
