Nagapanawagan ang Provincial Fire Marshal sa probinsya sang Negros Occidental nga maghalong kag likawan ang sunog bangud nagakaalarma na ang mga ini sa hinali nga pagtaas sang fire incidents sa probinsya.
Sa interview sang Bombo Radyo Bacolod kay Fire Superitendent Kim Celisio, nagsaka ang fire incidents sa una nga duha ka bulan sang tuig 2022.
Suno kay Celisio, sang Enero tubtob Pebrero 2021 nakarecord lamang sila sang 39 ka mga fire incidents apang sa karun sa pareho nga bulan nakarecord ang mga ini sang 64 fire incidents.
Suno sa provincial fire marshal ang masami nga ginatunaan sang sunog ang ginalakipan sang electrical connection kag octopus wires, napabay-an nga mga linuto kasubong man ang mga napabay-an nga nakasaksak nga mga appliances.
Nagpanugyan man ini nga sa tion nga magbrown-out indi magbutang sang kandila nga malapit sa kurtina.
Ibutang man ang nasindihan nga kandila sa labador nga may tubig kag indi ini pagpabay-an kun magtulog.
Suno kay Celisio sa tion nga magbakal sang extension wires dapat may yara sang Philippine Standard nga tatak.
