Kadungan sang pag-umpisa sang fire prevention month, nagpatigayon kaina sang aga sang kick off ceremony ang katapo sang Bureau of Fire Protection (BFP) sa syudad sang Bacolod.
Ini ang ginlakipan sang motorcades kag simultaneous blowing of horns.
Suno kay Fire Chief Inspector Rodel Legaspi, Bacolod City Fire Marshal, Nagpatigayon man ang mga ini sang virual lecture kag symposium kag nagpanagtag sang mga flyers sa mga business establishments.
Ang motorcade ang ginupdan sang private kag public sectors.
Nag-upod man sa motorcade ang counter part sang BFP nga uniformed personnel.
Ginpasalamatan man ni Legaspi sa pag-upod sa ila sang media.
Sa palaabuton nga Domingo may yara sang patigayunon nga simultaneous blowing of horns ang 12 ka fire stations nagikan sa central kag substations sang Bacolod City Fire Station.
Suno kay Legaspi, may yara man sila sang patigayunon nga blood letting activity sa Marso 21; sa March 23 may yara sang Open House activity nga lunsay pagahiwaton sa Bacolod City Fire Station; March 24 tubtob March 25 may yara sang Exposition/Exhibit of Vintage Fire Truck kag Firefighting Tools and Equipment sa Ayala Capitol Central samtang sa March 31 may yara sila sang patigayunon nga Sacred Mass Culmination Activity sa Bacolod City Fire Station.
Magapatigayon man ang BFP Bacolod sang 40-hours training sang pagtukod sang Volunteer Fire Brigade bilang force multiplier sa tion nga may magluntad nga sunog.
Nagpanugyan man si Legaspi nga dapat may yara sang numero sang local fire stations, kun sa diin ang BFP Bacolod ang mahimo nga macontact sa landline number 434-5022/434-5023 kag sa cellphone 09213417002.
Gilayon man nga magpahibalo sa mga otoridad nga may nagluntad na nga sunog agud gilayon nga marespondihan sa mas madali nga panahon.
Kasubong sang iban nga mga fire stations may yara man sang mga aktibidad nga patigayunon ang mga Negros Occidental Fire Stations kadungan sa pag-umpisa sang fire prevention month sa bulan sang Marso.
Suno kay Negros Occidental Provincial Fire Marshal Fire Superitendent Kim Celisio, nga tagsa ka fire stations ang nagpatigayon sang rekorida.
Nagcoordinate man ang mga ini sa mga kabarangayan ilabi na sa urban poor areas agud nga magpatigayon sang mga fire drills agud ma-educate ang mga pumuluyo sang ila himuon sa tion nga may sunog.
Nagpatigayon man sila sang “Kaisa Program” kaupod ang mga business sectors.
May yara man sila sang programa nga “Oplan Ligtas sa mga Pamayanan on the road”.
Samtang sa mga eskwelahan, nagapatigayon man sila sang music and arts contest para sa mga estudyante.
Ginpahayag man sini nga ang mga bombero ang indi lamang para sa mga nasunugan kundi ang mga ini ang nagapatigayon man sang emergency medical responses.
Nagpanugyan man si Celesio nga maghalong agud malikawan ang sunog.
Nagpanawagan man ini sa mga pumuluyo nga kun may yara sang sunog unahon ang pagtawag sa otoridad nayuhoy sa insidente antes ang pagkuha sang video.
