Ginpangalanan na sang Negros Occidental Police Provincial Office (NOCPPO) ang 18 ka mga lugar ang ginpaidalum bilang Election Hotspot Areas.
Nahibaluan nga ginbag-o sa Election Watchlist Areas (EWAS) ang pantawag sa mga lugar sang damlag lang apang liwat naman ini nga ginbalik sa Election Hotspot Areas kahapon.
Suno kay P/Lt Abegael Donasco, spokesperson sa NOCPPO nga ang 18 ang natunga sa isa ka yellow catergory, 13 ka orange category kag apat ang kabahin sa red category.
Ginpaidalum sa Yellow Category ang banwa sang Salvador Benedict.
Samtang ang yara naman sa Orange Category ang ginalakipan sang syudad sang Silay, Victorias, Himamaylan, Kabankalan, Sipalay kasubong man ang banwa sang Binalbagan, Manapla, Cauayan, Hinobaan, Ilog, Isabela, La Castellana kag Toboso.
Ang ginpaidalum naman sa RED CATEGORY ukon mga lugar nga ginakabig yara sa grave concern amo ang banwa sang Calatrava, Moises Padilla, Candoni kag syudad sang Escalante.
Ang mga nasambit nga lugar ang padayun paman nga ginaverify kun sa diin mahimo pa nga mabuhinan ukon madugangan.
Suno kay Donasco, ang Negros Occidental ang pinakamadamo sang kinahanglan nga deployment sang PNP Personnel gani magabulig man diri ang Bacolod City Police Office, Police Regional Office 6 kag ginalantaw man nga magapadala sang personnel ang iban nga Police Office sa Panay.
