Pagabuslan si late Pulupandan Mayoral Candidate Antonio Suatengco nga nagtaliwan sang Dominggo sang iya nga bata nga si Lorenzo Suatengco.
Si Antonio Suatengco ang nangin alkalde sang banwa sang Pulupandan sadtong 1988 tubtob 1992, kasubong man sang 1995 tubtob 2004 samtang siya ang nangin bise alkalde naman sa banwa sang 2007 tubtob 2016.
Ang 72 anyos nga si Suatengco ang nagapapili naman kuntani sa subong nga eleksyon sa pagbalik bilang alkalde sang banwa apang ini ang ginbawian sang kabuhi sang Dominggo bangod sa cardiac arrest.
Ang incumbent Mayor sa Pulupandan nga si Miguel Antonio Penia, ang nagapapili naman bilang bise alkalde.
Ang duha ang lunsay wala naman sang kontra sa 2022 election.
Paathag ni Negros Occidental Election Supervisor Atty Roberto Salazar, nga ang mahimo lang nga makabulos sa nagtaliwan nga kandidato amo ang kaapelyido sini kag ginpili sang iya mga kapartido bilang substitute.
Ginpili sang Nationalist People’s Coalition (NPC) nga substitute sini amo ang iya nga bata nga si Lorenzo Suatengco, ang Association of Barangay Captain (ABC) president kag Sangguniang Bayan member.
Ini man ang anay Sangguniang Kabataan (SK) Federation President sa bilog nga Negros Occidental.
Suno kay Salazar, indi na mahimo mailisan ang pangalan sa balota bangod natapos na sa pag-imprinta ang Commission on Election (Comelec).
Bangod indi na mapanas kag maliwat ang pangalan sa balota, ang tanan nga magaboto sa pangalan ni late Pulupandan Mayoral Candidate Antonio Suatengco ang automatic naman nga magasulod sa boto para kay Lorenzo Suatengco.
Ang sa karun nga bise alkalde sa Pulupandan nga si Anthony Gerard Suatenco ang bata man ni late Pulupandan Mayor Antonio Suatengco kag sa karun nagapapili bilang konsehal.
Suno kay Atty Salazar, dapat nga ipasa sa Municipal Comelec Office ang death certificate sang nagtaliwan nga kandidato kag isumiter ang mga papelis angot sa substitution.
