Nangin matawhay ang Miyerkules de Badlis ukon ash Wednesday sa syudad sang Bacolod.
Kaina sang aga nagpatigayon sang misa kag pagbadlis sa Diocese of Bacolod.
Ang alas 06:00 sang aga nga misa ang ginpangunahan ni Most Reverend Bishop Patricio Buzon sa San Sebastian Cathedral.
Sa interview sang Bombo Radyo Bacolod kay Bishop Patricio Buzon, ang mga nagtambong ang nagasunod sang pagsuksok sang facemask kag nagasunod sang social distancing.
Suno kay Bishop Buzon ang mensahe nga luyag ipalab-ot sa homiliya subong nga ash Wednesday amo ang amat amat na nga pagbalik sang mga tawo sa sabak sang Ginoo.
Ginapahayag man sang homiliya nga dapat magpenetensya kag magpuasa ang mga tawo sa subong nga pag-umpisa sang lenten season.
Ginpahayag man ni Bishop Buzon nga dapat indi pagdulaan sang tawo ang Diyos sa kabuhi, bangud ang kabuhi ang mahimo madula sa tion nga madula ang Diyos.
Santo man sa homiliya sa tion nga magpuasa, likawan ang mga ginakahuyugan agud nga mas makapamalandong kag mas mapadalom ang relasyon sa Ginoo.
Ginapanawagan man sang obispo kadungan sang pag-umpisa sang lenten season, nga pangamuyuan ang mga pumuluyo sa Ukrain bangud sa nagaluntad nga kinagamo.
