Nagpasalig ang city director sang Bacolod City Police Office nga tinguhaan nila nga masolbar ang pila ka insidente sang shooting sa ciudad sang Bacolod.
Sa interview sang Bombo Radyo Bacolod kay Police Col.Thomas Joseph Martir, tinguhaan sang mga ini nga matumod ang suspetsado nga nagpatay sa anay police nga gintiro sa atubang sang University of Negro Occidental-Recoletos sang Hwebes sang gab-i.
Suno kay Martir may yara sang ginapatigayon nga checkpoints ang Bacolod Police Station apang limited lamang sila sa visual search kasunod sang election gun ban guidelines ukon sang plain view doctrine.
Ginpahayag man sini nga wala pa matumod kun may yara sang kontra ang biktima.
Suno diri wala man niya nakilala ang biktima apang base sa koordinasyon sini kay Police Major Leo Estopa ang station commander sang Bacolod Police Station 6 may yara sang kaso si anay PO1 Ryan Lumogdang.
Madumduman nga si Lumogdang ang gintiro sa atubang sang University of Negros Occidental – Recoletos sa Barangay 40, Bacolod City sang Miyerkules sang gab-i.
Ang 41-anyos nga si Lumogdang ang residente sadto sang Brgy. 3 apang nagapauli na karon sa Celine Homes, Brgy. Estefania, Bacolod City.
Halin sa Brgy. Taculing ang biktima sang ginlagas sang mga suspek kag ginluthang paglab-ot sa atubang sang nasambit nga unibersidad.
