Natalupangdan sang Philippine Drug Enforcement Agency nga nagkambyo naman ang trend sa pagtransport sang illegal nga druga nagikan sa courier padulong sa sea travel kaangay sang pagtabok ni Vicente Sepuesca sang lima ka kilo nga shabu sa Escalante nagikan sa Cebu.
Sa interview sang Bombo Radyo kay PDEA Region 6 Director Alex Tablate, nagsaylo sang trend sang transport bangud mabug-at kun ipadala sa courier ang pila ka kilo nga shabu kag madetect ini sang mga empleyado.
May agreement man ang PDEA kag ang mga courier nga itimbre sa ila ang impormasyon kun may nagpadala sang illegal nga druga.
Kun ibase sa recent seizures, majority nga shabu suno kay Tablate ang nagikan sa Luzon kag halos pareho nga Chinese ang packaging sini, kaangay sang tatlo ka kilo nga shabu nga nakumpiskar sa BREDCO Port sang bulan sang Enero.
Ginaimbestigaran pa man sa karon kun isa lang ang ginhalinan sang supply bangud sa pareho nga packaging.
Suno kay Tablate, imported ang shabu sa Pilipinas bangud naguba na ang tanan nga shabu laboratory humalin sang nagsugod ang Duterte administration.
Apang wala man ginadula ni Tablate ang posibilidad nga diri lang sa Pilipinas gin-imprinta ang packaging apang nakasulat ini sa Chinese agud nga madivert ang atensyon sang mga otoridad.
Suno kay PDEA official, indi malayo nga may magagmay ukon kitchen-type laboratory pa sa Pilipinas apang kun nahamtang ini sa Luzon, indi na makalab-ot sa Region 6 ang supply bangud indi sila makaproduce sang dako nga volume.
