Aminado ang Philippine Drug Enforcement Agency nga indi madula ang posibilidad nga mahimo nga itabok pa kuntani sa Panay ang pila ka portion sang lima ka kilo nga shabu nga nakumpiskar kay Vicente Sepuesca kun ini nadakpan sa Barcelona Port sa Escalante City.
Suno kay PDEA Region 6 Director Alex Tablate, taggamay lang ang shabu nga marekober sa mga drug buybust operation sa Panay samtang ang nagaabot naman sa Negros Occidental ang nagikan sa Cebu.
Indi man madula ang posibilidad suno kay Tablate nga ang recoveries sa mga buybust operation sa Cebu ang nagikan man sa National Capital Region.
Suno sa PDEA official, indi apektado ang kalidad sang shabu bisan malawig ang byahe sini bangud naka-vacuum seal ini kag may packing tape.
Bangud sa kompetisyon, ginatanyag naman sang mga runner sa mas mataas nga presyo kun ginapresentar ini nga good quality.
Sa karon, P6.8 million ang market value nga gintalana sang Dangerous Drugs Board para sa isa ka kilo.
Tinutuyo sini suno kay Tablate nga makita ang balor sang druga nga nakumpiskar kag wala man sang pagbag-o sa P6,800 per gram nga presyo.
