Nagpasalig ang Coast Guard Station Negros Occidental nga hugot ang pag-usisa sa mga salakyan nga nagatabok sa probinsya sakay sa roro vessel agud indi madakpan ang nagapasulod sang illegal nga druga.
Ini ang kasunod sang pagkadakop kay Vicente Sepuesca nga nagdala sang lima ka kilo nga shabu nagikan sa Cebu patabok sa Barcelona Port sa ciudad sang Escalante.
Sa interview sang Bombo Radyo kay Commander Joe Luviz Mercurio, chief sang Coast Guard Station Negros Occidental, may narcotic detention dogs nga nakadeploy sa nagkalain-lain nga roro port agud matsekyar ang mga salakyan kag may yara ini sang koordinasyon sa Philippine Drug Enforcement Agency kag Philippine National Police.
Suno kay Mercurio, indi gid man tuman kadamo ang sniffer dogs sang PCG apang bastante man nga makapatigayon sang panneling sa mga pwerto kaupod ang explosive detection dogs.
Ang mga puerto nga ginabantayan amo ang yara sa San Carlos, Escalante, BREDCO kag Banago.
Bangud sa padayon nga enhancement sang assets sag PCG, ginalauman man sang opisyal nga may dugang nga canine kag handlers nagikan sa training facility sa Luzon kag Romblon subong nga tuig.
