Opisyal na nga ginproklamar kahapon sang PDP-Laban Cusi faction sa pagpamuno ni Energy Secretary Alfonso Cusi nga si Davao City Mayor Sara Duterte ang vice-presidential candidate sang partido.
Ang proclamation rally ang ginpatigayon sa San Mateo, Rizal kahapon.
Sa isa ka press release, ginpahayag sang PDP-Laban nga ila man igaproklamar ang pito ka senatorial candidates sa idalum sang “Tatak Duterte” team nga nga ginalakipan sang aktor nga si Robin Padilla, broadcaster nga si Rey Langit, House Deputy Speaker Rodante Marcoleta, former Cabinet Secretaries Greco Belgica, Salvador Panelo, John Castriciones kag former Energy Undersecretary Astra Pimentel.
Ang official endorsement sang partido sa kay Sara Duterte ang ginpatigayon masobra duha na ka bulan matapos nga gin-adoptar sang partido ang Davao City Mayor bilang vice presidential bet para sa May 9 elections.
Suno kay Cusi, ‘Tuloy ang Pagbabago” ang nangin marching order ni Presidente Rodrigo Duterte sa tanan nga PDP Laban Senators nga ipadayun ang genuine empowerment para sa tanan nga Pilipino, partikular na ang mga poorest of the poor, neglected, minority, indigenous people ilabi na ang masunod nga henerasyon.
Dugang pa sini nga ang event nga gin-organisa sang partido kag ni San Mateo Mayor Cristina Diaz, ang magakick off kag magaserbe drumbeat para sa sunod-sunod na nga mga campaign events sa bilog nga pungsod agud nga ipakita nga ang PDP Laban amo ang dominante nga partido sa Pilipinas.
Dugang pa ni Cusi nga pormal man nga ilunsyar sang PDP Laban ang “11-point Agenda for Continuity”.
Suno diri, bangod sila ang Tatak Duterte, ang PDP Laban senatorial candidates ang magapadayun sa reform agenda ni Presidente Duterte kag iga-institutionalize ang mga adbokasiya, vision kag “Tapang at Malasakit” program sang Presidente.
Ang 11-point Agenda for Continuity ang ginalakipan sang (1) pagbato sa kurapsyon; (2) patapos sang kapigaduhon; (3) pagpasanyog sang peace and order; (4) pagtapos sa pandemic; (5) pagpapas sa communist terrorism sa pungsod; (6) pagsustain sang economic growth; (7) paghatag sang trabaho; (8) pagpabaskog sang national defense kag foreign relations; (9) Educational reforms; (10) Decentralization and local government empowerment; kag (11) Charter change and Federalism.
