Aminado ang grupo sang mga mamumugon sa probinsya sang Negros Occidental nga tion na agud sakaan ang sweldo sang mga empleyado bangud sa padayon nga pagsaka sang produktong petrolyo kag pagmahal sang mga balaklon.
Sa interview sang Bombo Radyo kay Wennie Sancho, secretary-general sang General Alliance of Workers Association, duha na ka tuig nga wala sang wage increase samtang nanaog man sang 24 percent ang purchasing power sang mga mamumugon, buot silingon, 74 centavos nalang ang balor sang piso.
Bangud sini, P300 nalang ang balor sang P395 nga minimum wage sa Western Visayas.
Suno kay Sancho, may may derecho ang mga mamumugon nga magfile sang petition para sa wage hike bangud yara ang mga supervening conditions nga gintalana sang National Wages and Productivity Commission para diri.
Sa Marso 10, magasapol ang Regional Wage Board sang Western Visayas kag magamanifest diri si Sancho kun ano ang plano sang board subong nga nagasaka ang presyo sang tanan nga balaklon.
Bangud ginaduso man sang transport sector nga sakaan ang pamasahe, may rason gid ang mga mamumugon suno kay Sancho nga maghingyo sang saka sa sweldo.
Kun matapos na ang meeting sang board sa Marso 10, magasapol ang mga labor groups sa probinsya agud magdihon sang wage hike petition.
Nagapati naman si Sancho nga wala sang rason ang management sector nga magpamatok sa wage hike bangud nagbalik na ang ekonomiya kag duha na ka tuig nga wala sang saka sa sweldo.
