Nagapanawagan ang chairman sang committee on transportation and traffic sa syudad sang Bacolod sa mga drivers nga indi magpagamit agud nga magpatigayon sang transport strike bangud sila man sa gihapon ang mapierde.
Suno kay Bacolod City Councilor Dindo Ramos, sa tion nga indi magbiyahe ang mga drivers sila man ang magasuprer bangud wala sila sang kita.
Ginpahayag man sini nga kun ang modernization program ang rason sang United Negros Drivers and Operators Center (Undoc) sa pagrally, wala man mahimo ang Local Government Unit (LGU) bangud ang modernization program sang mga jeep ang isa ka national policy.
Suno kay Ramos, nakahimo naman ini sang resolusyon agud mahatagan sang probation ang modernization program kag napadala naman ini sa Land Transportation and Franchising Board (LTFRB).
Suno diri, ang tanan nga mga concerns sang mga transport groups sa syudad ginapamatian niya kag gina-address.
Suno kay Ramos dapat ang mga representative sang partylist sa kongreso ang ginakutot sang mga ini angot sa modernization program agud mahimuan sang solusyon bangud kun diri sila mapatigayon sang strike sa syudad sang Bacolod, indi man sagihapon sila mabatian sang national government nga nagapatuman sang modernization program.
Samtang ginpahayag man ni Ramos nga indi man mag-upod sa protesta ang Federation of Bacolod City Drivers Associations (FEBACDA) kag Sentrong Samahan ng Tsuper at Operators Negros (SSTONE).
