Ginalauman ang pag-abot sang dugang nga 25,000 doses sang Pfizer COVID-19 vaccine nga reformulated para sa edad lima tubtob onse anyos sa probinsya sang Negros Occidental subong nga adlaw.
Suno kay Negros Occidental Provincial Administrator Atty Rayfrando Diaz, sa karun kapin 25,000 palang ang mga edad lima tubtob onse anyos nga nabakunahanan na sa COVID-19 sa probinsya.
Nagapasalamat naman ang Provincial Health Office (PHO) kag Hospital Operation Department bangod sa padayun nga pag-abot sang dugang nga suppky sang bakuna para sa mga kabataan.
Pinaagi sini, mahimo naman nga mapadasig ang pagbalik sang face-to-face classes sang mga estudyante.
Sa pihak nga bahin, ginapakamaayo naman ni Diaz nga nagdangat na sa 80 porsyento sang 70 percent target population sang probinsya ang nabakunahan.
Ini ang ginalantaw nga resulta na sang tayuyon nga kampanya sa COVID-19 vaccination program.
Pasalig naman sang Provincial Administrator nga wala sang kakulangan sa supply sang bakuna sa Negros Occidental para sa nanarisari nga age bracket kun sa diin nagapadayun man ang mga vaccination programs sa mga local government units (LGUs) sa probinsya.
Kahapon, yara nalang sa 95 ang mga nabilin nga aktibo nga kaso sa COVID-19 kag padayun pa nga naganubo.
Nahibaluan nga sang damlag lang, yara pa sa kapin 4,000 ang mga aktibo nga kaso sang COVID-19 sa Negros Occidental.
Suno kay Diaz, ginalauman na sang probinsya nga sa mas madali nga panahon, magapanaog na sa endemic ang COVID-19 pandemic.
Aminado naman si Diaz nga karun nga nagapadayun na ang pagkampanya sang mga politiko, indi man malikawan nga magdinaguso ang mga pumuluyo gani panugyan sang Provincial Administrator nga importante nga bakunado ang mga pumuluyo.
Ginakalipay man sang Provincial Government nga nagresulta na ang paghugpong sang mga Negrense sa pagpakigbato batok sa virus.
