Magabaton sang sanction ang mga kandidato nga indi magtambong sa presidential kag vice presidential debates nga gin-organisa sang Commission on Elections (COMELEC).
Suno kay Comelec acting chairperson Socorro Inting, ang mga debate skippers ang indi na sarang nga makagamit sang official e-rally channels sang poll body sa nabilin nga campaign period.
Suno kay Inting, nagalaom ini nga tanan nga kandidato ang magapakigbahin sa debate nga ginsponsor sang Comelec.
Suno naman kay Comelec spokesperson James Jimenez, ang sanction ang ila na nahisugtan kaupod ang mga kandidato.
Igapabilin man sang COMELEC nga bakante ang podium sa mga indi makatambong sa debate.
Nagpasalig man ini nga magapabilin nga confidential ang mga pamangkot para sa nasambit nga aktibidad.
Kahapon, nagperma ang Comelec sang agreement sa local firm nga Impact Hub Manila agud magco-produce sang lima ka mga presidential kag vice presidential debates, nga pagasuguran sa Marso 19.
Ang series sang debate ang pagatawgon nga “Pilipinas Debates 2022: The Turning Point,” kag patigayunon sa Sofitel.
Ang Impact Hub Manila, ang grupo sa likod sang Vote Pilipinas, ang magapatigayon sang tatlo ka mga presidential debates kag duha ka mga vice presidential debate.
Ang presidential debates ang patigayunon sa Marso 19 kag Abril 3 samtang sa Abril 24 ang presidential town hall debate.
Sa Marso 20 kag Abril 23 naman ang vice presidential debates kag Abril 23 ang vice presidential town hall debate.
